Inoti y’amafaranga 1000 n’iy’500 zigiye gusimbuzwa inshya.

Mu myanzuro y’Inama y’Abaminisitiri yateranye ku wa Mbere tariki ya 28 Mutarama yemeje amateka abiri ya Perezida arimo rimwe rishyiraho inoti nshya y’amafaranga igihumbi n’irindi rishyiraho iy’amafaranga magana atanu.

Izi noti zigomba gushyirwa ahagaragara na Banki Nkuru y’Igihugu zizasimbura izari zisanzwe zirimo inoti y’amafaranga igihumbi yari imaze imyaka igera kuri ine ku isoko n’iya magana atanu nayo yari yarasohotse mu 2015.

Inoti y’amafaranga igihumbi yari isanzwe yiganje mu ibara ry’ubururu, uruhande rumwe irimo igishushanyo kigaragaza inzu ndangamurage y’u Rwanda, hakabamo igishushanyo cya mpande eshatu kirimo ishusho y’inuma.

Iya magana atanu nayo yari isanzwe mu ibara ry’ubururu bwerurutse irimo abana bari kwigira kuri za mudasobwa, hanyuma ku rundi ruhande hakabaho inka.

Akenshi inoti ijya guhindurwa bitewe n’impamvu zikomeye kandi zihariye.

Nk’inoti ya 500 Frw yabanjirije iriho ubu, yasimbuwe bitewe n’uko yari ifite ikibazo cy’uko itinjiraga mu byuma bibara amafaranga ngo biyibone neza, rimwe na rimwe bikayisimbuka.

Ikindi kandi harimo no guhindura bimwe mu bimenyetso byayirangaga, ibyariho birimo abaturage basoroma icyayi bigasimbuzwa ibimenyetso by’ubukungu bw’igihugu harimo n’ikoranabuhanga.

Inoti ya 500 Frw yari isanzwe yakunze kunengwa na benshi bagaragaza ko isaza vuba ugereranyije n’izindi. Bivugwa ko iyi note yari yaracapiwe mu Burusiya mu gihe izindi zacapiwe mu Budage.

Mu ikorwa ry’inoti, hifashishwa urupapuro rwihariye ndetse buri gihugu kiba gifite umwihariko wacyo ku buryo urupapuro rwakoreshejwe ku mafaranga yo mu Rwanda ruba rutandukanye n’urw’ahandi.

Urugero, nk’idolari rya Amerika, urupapuro rurigize si nka rumwe rusanzwe kuko rwifitemo imiterere nk’iy’igitambaro gisanzwe. Nubwo bitaboneshwa amaso, ruriya rupapuro rugizwe na cotton (igitambaro) ku kigero cya 75% n’ubundi bwoko bw’igitambaro bwitwa linen ku kigero cya 25%. Iyi linen ahanini nibwo bwoko bw’ibitambaro usanga ibiringiti byinshi bikozwemo.

Sangiza abandi:

Leave a Reply

Your email address will not be published. Required fields are marked *